بـ اكتب بـ احبك.. أحمد مرزوق

أحمد مرزوق

بـ اكتب بـ احبك ع الورق فرسمت نيل

ورسمت طفل بيتولد أسمر جميل

حبيت اكمل فى الغزل ظهر الطوفان

كسر شراع المركبة رجعت تميل

ليه كل ما امشى فى سكتك بتعب قوام

ليه كل ما ارسم ضحكتك بلقى انهزام

جوايا طفل بيعشقك فاكرك سماه

جوايا طفل مصدقك تاه فى الزحام

كل اللى كانوا بيعشقوا فيكى الصمود

فارقوكى لما اتيتموا رجعوا فى تابوت

وانا لسه بحبى وبارسمك طوق النجاة

وانا لسه بحلم أحضنك من غير ما اموت

انتى الحقيقة الممكنة وانتى السراب

انتى اللى أبواب السما وانتى التراب

جواكى شئ بيشدنى أكبر واعيش

جواكى شئ بيهدنى أرجع خراب

تفتكرى ممكن أبقى فين أو أبقى مين

اسم فى أسامى اللى اتنسوا أو بين قوسين

مركب وتاهت فى المحيط من غير دليل

سبحة فى رحاب السيدة أو فى الحسين

كل اللى فات ممكن يكون إحساس عجيب

لحظة فى طابور المدرسة أو فى القريب

لكن أكيد إن فى براح الكون ما فيش

ولا عين تساع يوم دمعتى وهافضل غريب

شاهد أيضاً

محمد عادل

شوبان .. محمد عادل

  أستمع أحيانًا إلى موسيقى شوبان وأقول في نفسي: «كيف لرجل لم يشهد بشاعة الطاعون …

اترك رد