أكيد بُكرة .. محمود الطويل

محمود الطويل
محمود الطويل

 

وكل ما اطل

أنا المصلوب على بابك

بإيد الكل

يا عشقي ياللي أعتابك

طواها الذل

أضم الشمس وترابك

واموت في الضل

 

أموت ازاي وانا الشاهد على بُكرة

أنا الشعب اللي حاضن همّه بالفكرة

وانا الخُضرة

أنا الفاس اللي دق وشق بطن الغيط

وانا في المصنع المكنة وبرضه الزيت

 

أنا الرقّة في بحر النيل

وباشرب ميّتي عكرة

وانا اللحن اللي في المواويل

وتنسيني ولا ذكرى

خسارة يا مصر

ياللي القصر يسبيكي

ويقتلني

خسارة يا مصر

أنا اللي عشق نور الشمس فـ عنيكي

مبهدلني

لكِن بُكرة

أكيد بُكرة

أكيد ليكي

وهنغنّي

لكل الناس

بكل حماس

ونزرع في القلوب وردة

ونجزر رقبة الحراس

* أغطس 1979 ـ من ديوان (عيونك سكة الفقرا).

شاهد أيضاً

محمد عادل

شوبان .. محمد عادل

  أستمع أحيانًا إلى موسيقى شوبان وأقول في نفسي: «كيف لرجل لم يشهد بشاعة الطاعون …

اترك رد